السلام عليكم ورحمته الله وبركاته //
اليوم يا إخواني راح احكي لكم مواقف بعضها انا مريت بها شخصيا وتحدث بشكل يومي ..
وانا متأكد إن أغلبكم مر بمثل هذا المواقف اللي ابغاه كل واحد يعلق ويقول لي رأيه الشخصي وايش أكثر المواقف اللي يقهره وكيف ينوي التعامل معه .....
بسم الله نبدأ //
1/ أحيانا تضطر انك توقف سيارتك في مكان ما ولاتجد وبالصدفة تشوف واحد يبغى يطلع طبعا أنت تستنى شوي وأول ما يخرج يطلع لك واحد من تحت الأرض وياخذ الموقف اللي أنت ناوي تاخذه ....
2/ وأنت نازل من عند واحد من أقربائك أو أصحابك إلا وتشوف واحد قاعد على الكبوت أو متكي على جهة باب السيارة وأول ما يشوفك يقوم على طول هذا لو عدم لك البودي وقمت تصارخ فيه ...
3/ لما تكون محافظ على سيارتك وتخاف عليه من الريح (بالأخص لو معك اكورد اللون ابيض) تخيل انه توك مطلع السيارة من المغسلة وملمع الكفرات وماشي على اقل من مهلك .. إلا وشوي يجيك واحد من اللي معاهم كابريس ما ادري موديل 86م والرجال يسوق برجل ورافع رجله الثاني و قاعد يفصفص ويميل عليك وأنت تخاف وتقعد تزمر له وهو مايدري بالدنيا... ليين ما يصدمك وبالنسبة له ما يحس بشيء ... اااخ يالقهر وترى لاتفرح حتى لو عندك تأمين ماراح ترجع البويه زي حق بلده ..
4/ تدخل حي أول مرة تدخله وماشي خايف لا تأكل حفرة أو مطب ولا وراك واحد يكشخ لك العالي ولا يطفشك تمشي و أول ما تأكل لك حفرة محترمة ساعتها تلاقيه هدى من سرعته او يمشي من جنبك كأنه يقولك تستاهل ...
5/ بعض الناس (الله لا يوفقهم )ياخذوك فار تجارب وخاصة أيام المطر إذا مشيت وراه يغثك ويوقف وإذا تعديته
يقعد يزمر لك علشان تمشي من فوق المويه وهم يتفرجوا عليك لو عديت خير وبركة يقلدوك .. لو شربت مويه ووقف عليك السيارة يعكسون الطريق ويطالعون فيك بنظرة كلها شفقة ...
6/ تمشي في خط واللي قدامك ماشي بشويش وكل شوي يوقف و فجأة يجنب سيارته ( كان يدور على موقف) طيب يا اخي أشر على الأقل علشان الواحد يدبر نفسه ويعديك ...
7/ تفتح الإشارة وكل الناس تمشي وتقعد تزمر إلا اللي قدامك مايدري عن شي يا انه يتكلم بالجوال أو واحد شايب وماسك الدركسون بيدينه ... ولما تقرب الإشارة وتحمر يحرك ويتركك أنت أول واحد في الإشارة ...
8/ مطلع سيارة على الزيرو ... بعدها بكم يوم وتشوف واحد مخرخش الكبوت ولا مخدش السيارة من الرفرف الى شطنة السيارة ... هذا مو واحد حاقد هذا بزر من البزارين عندهم مرض مايتحملوا يشوفوا سيارة نظيفة ويسيبوها في حالها ..
9/ تعطي سيارتك لواحد من جيرانك او واحد من اصحابك علشان يودي اهله مشوار او سفر .. وتيجي ثاني يوم تلاقي السيارة من جوه شيء ... البيبسي نصها مكبوب فوق المقاعد ولا تحصل آثار الاحذية (الله يكرمكم) واضحة فوق المقاعد وموسخة بالتراب ...
10/ماشي في الخط السريع وشايف واحد جاي من بعيد ...وانت ناوي تفسح له مجال بس هو تك تك تك تك تك تك فرحان بالزينون حقه ...هذا خليه زي ماهو لين يهدى بعدها بعد له ...
في المسجد/
تدخل المسجد متأخر شوي ولما تيجي تكمل عدد الركعات اللي باقي لك الا والكل مستعجلين وقاعدين على راسك لما تسلم (تقول كأن بيتهم بينحرق).. هذا لو ماقطعوا صلاتك وعدوا من قدامك ...
في المطعم او البوفيه /
تقول للرجال سوي لي كذا وكذا وحط وما تحط وهو يهز راسه كأنه عارف ... وفي النهاية يسوي لك اللي مايعجبك .. وتضطر تشتريه وتاكله بدون نفس ...
اترككم في امان الله